Isumat.com/7:41AM, December 2, 2020
Nadarahigan an mamurayaw nga pag-ukoy ngan pagpakabuhi hin kadam-an nga mga pamilya ha tulo nga sitio ha Kananga, Leyte tungod han nagsunod-sunod nga enkwentro ha butnga han Philippine Army ngan rebelde nga NPA.
Dida han report nga nahikay han Isumat.com, maabot hin 401 katawo in nanlitas tikang ha ira mga puy-anan ngan nagpapabilin tubtob yana ha evacuation center. An nasabi nga mga molopyo in tikang ha mga sitio han Matin-aw, Motorpool ngan Kawarayan. Temporaryo hira nag-uukoy ha eskwelahan ha Brgy Rizal.
An LGU-Kananga an naghahatag han pagkaon ngan mga panginahanglan han mga evacuees, sumala pa han report.
Han nag-agi nga lima ka adlaw, duha na ka beses nga nagka-ada hin agway an magkaluyo nga pwersa didto dapit hini nga mga lugar. Dida han syahan nga enkwentro namatay an 21-anyos nga babaye nga NPA nga gintotoohan bag-o nga na-recruit han kagi-usan nga kumunista.
Samtang, nakarekupo naman hin mga armas ngan iba pa nga mga higamit an mga tropa han gobyerno han ira igkasurapo in pira nga mga rebelde nga kumunista ha Northern Samar hadin Nobyembre 28.
Sumala han report, nagkaada anay hin balyu-ay hin bala an mga sundalo han 43rd IB kontra han mga NPA ha Brgy Mabini, Catarman. Katapos han 15-minutos nga pinusilay, umatras an mga kumunista ug gintotoohan nga mayda nagka-iigo ha ira tungod han mga dugo han dalan nga ira gin-agi-an.
Narekupo han militar dida han lugar han enkwentro in usa nga M16 rifle, usa nga shotgun, granada, higamit hin paghimo hin bomba, kadam-an nga mga bala. cellphone, laptop, personal nga mga higamit ngan subersibo nga mga dokumento. #
