Isumat.com/1:21PM, November 7, 2020
Tungod han hinay-hinay nga pagkamang han Covid-19 ha Eastern Samar, nagdesider hi Gobernador Ben Evardone nga mas istriktohan an mga patakaran ha iya lalawigan.
Dara hini, tikang han gihabubu-i nga level han kwarentina nga Modified General Community Quarantine, nagpalusad an gobernador hin kamanduan nga utro igpailarum an iya nasasakupan nga lugar ha General Community Quarantine.
Duha ka semana nga igpapasunod an GCQ ngan ha ilarum hini, deri puede maghimo hin katitirok labi na kun para ini ha pagrisyo. Deri gihapon igintutugot an pag-gawas ha balay han deri pa 15-anyos an edad ngan lapos ha 65-anyos labot la kun duro gud ka importante an rason.
Gintutugutan naman an relihiyoso nga aktibidadis basta tobtob la ha 30% han kapasidad han singbahan an ma-atender. Hapagkayana, sobra 60 an aktibo nga kaso han Covid didto han probinsya ngan kasagaran hini in aadto ha Norte nga dapit han lalawigan sugad han Guiuan, Mercedes, Salcedo, Gen MacArthur, Giporlos ngan Balangiga. Upat na an Covid Patients ha E. Samar an naawat an kinabuhi. Umabot na 150 an Total Covid Cases han probinsya..
Ha luyo nga bahin, padayon naman an pagtikadamo han nagpapaka-recover tikang han impeksyon han virus. Dida han report han DOH-Regional Office kakulop, Nobyembre 6, mayda 92 nga pasyente an bag-o nga nakatalwas han Covid. Ini in nagdara ha 90% nga recovery rate hapagkayana. Na-rerepsesentar ini han 6.593 han 7,218 nga Total Cases han rehiyon.
Nadugangan naman hin duha ka tawo an namatay nga positibo han kagaw. Hira an 66-anyos nga alkalde han Palapag, N. Samar nga iginlubong kakulop mismo didto han iya bungto, ug an pasyente tikang ha Giporlos, E Samar nga namatay yana nga aga. Ha kabug-usan 69 na nga Covid Patients ha Sinirangan Bisayas an namatay. An Active Cases yana in 607. #
