Isumat.com/7:58AM, October 9, 2020
Iginkalipay ngan iginkakaparayaw han mga Biliranon an katudlok han ira ka-probinsya komo bag-o nga Assistant Secretary han Department of Labor and Employment (DOLE).
An 39-anyos nga hi Victor del Rosario nga taga Naval, Biliran an gin numbrahan ni Presidente Duterte nga lumingkod han nasabi nga posisyon. Hi Del Rosario in nanumpa ha iya katungdanan kakulop nga adlaw ha atubangan ni Labor Secretary Silvestro Bello ha Intramuros, Manila.
Antis matudlok ha iya pwesto ha DOLE, hi Del Rosario in nagserbe komo Commissioner han National Youth Commission ngan kaapi han Appeals Commitee han Movie Review and Classification Board (MTRCB)
Nag-eskwela hiya han elementarya ngan nagtapos komo Valedictorian ha Villalon Central School ha Calubian, Leyte; ngan nakatapos han sekondarya ha San Nicolas Academy ha Cebu City hadton 1999.
Naka-gradwar hiya ha Leyte School of Professionals, Tacloban City hadton 2006 ha kurso nga Public Administration Major in Management. Hapagkayana, nagpapadayon an iya pag-eskwela basi maka-angkon han Doctorate in Leadership ha University of Makati.
An iya eksperiensysa ha trabaho in ginlalakipan han pagin Sanguniang Bayan member han Naval hadton 2010, Provincial President han National Movement of Young Legislators, ngan Executive Assistant ha Office of the Mayor-Naval, Biliran.
Nagtrabaho gihapon hiya komo College Instructor ha Naval Institute of Technology ngan Program Host ha MBC Radyo Natin ha Naval. #
