Isumat.com/6:21AM, September 30, 2020
Suspendido an operasyon han Ormoc District Hospital (ODH) kataliwan la nga igmando ni City Mayor Richard Gomez nga ig-lockdown ini hin 14 ka adlaw tinikangan kakulop, Setyembre 29, 2020.
Tulo nga mga nurses han ODH an nagpositibo han Covid-19 sanglit iminando ni Gomez nga undangon la anay an serbisyo han hospital samtang naghihimo hin mga aksyon basi kabalabgan nga magsarang pa an ginkakahadlukan nga kagaw.
Subay han inisyal nga panginano han City Government, usa nga nurse han ODH nga taga Hilongos, Leyte in umuli ngadto han iya bungto. Komo APOR (Authorized Person Outside Residence) nakakabiyahe tigawas ngan tisulod ha Ormoc ini nga nurse kay kumpleto man hiya han mga dokumento.
Nagsering hi Gomez nga dida han una nga semana, umuli ha Hilongos an APOR ngan pagbalik ha Ormoc nagpakita na ini hin mga sintomas sanglit ginkuhaan hin swab test ngan nagpositibo an iya sample ngan gintotoohan nga hiya an nakatapon han iya mga ka-urusa ha trabaho.
Tungod hini nga kamanduan nga lockdown, deri makakagawas tikang han hospital an mga doktor, nurses, personales ngan mga pasyente ngan bantay han mga pasyente tikang kakulop tobtob matapos an duha ka semana nga lockdown.
Nagdudumara liwat yana hin contact tracing an Ormoc Task Force basi matudlok kun mayda posible iginka-urusa an mga natapnan ha gawas han hospital. Ginseseguro gihapon han City Government nga kinahanglan magkaada hin kalugaringon nga Isolation ngan Quarantine Facility an ODH.
An titimangnoon la han ODH an mga pasyente nga nahi-abtan han lockdown samtang naka-confine ha nasabi nga hospital.
An City Government an maghahatag han pagkaon para han ngatanan nga aadto ha sulod han hospital durante han lockdown. Para han iba nga mga kinahanglan, nagbutang hin mga personales an City Government nga amo an mapalit o makuha hini nga mga butang ha gawas han hospital.
Nakakagiruginhawa na unta adto an Ormoc tungod kay usa nala an Active Case han syudad hadin Lunes, pero kakulop nahireport ini nga tulo nga personales han ODH nga nagpositibo.
Temporaryo gihapon nga ginpasadhan ni Gomez an mga carenderia ngan mga sari-sari stores sapit han ODH. An gintugutan la nga magpadayon an operasyon amo an mga farmacia harani han hospital. #
