Isumat.com/8:09AM, August 21 2020
Usa nga nagtatrabaho ha Department of Public Works and Highways (DPWH) an nakwelyuhan han mga otoridad dida han buy-bust operation ha Tabango, Leyte kakulop, Agosto 20.
Ginkilala an na-aresto nga hi Eduard Veloso, nagtatrabaho ha DPWH- 3rd Leyte Engineering District. Hi Veloso in residente han Poblacion, Tabango.
Pasado alas 4 han kulop, an mga operatiba han PDEA, Provincial Drug Enforcment Unit ngan Tabango PNP an naghimo han operasyon ha Brgy Inangatan basi madakop an High-Value Target nga suspetsado.
Nakumpiskar tikang kan Veloso an lima ka sachet hin gintotoohan nga shabu ug an kwarta nga gingamit dida han transaksyon.
Nagpahayag an mga imbestigador nga ira yana ginsususi kun kaapi hi Veloso han grupo ni Edwin Navia. Hi Navia in nadakop ha Kananga ug an iya sindikato in nagi-os ha Matag-ob, Villaba ngan Tabango.
Nakapaslak na yana hi Veloso ha PDEA Detention Facility ngan nakatalaan umatubang han mga kaso nga igsasalawad kontra ha iya. #
