Isumat.com/8:06AM, August 1, 2020
Tulo nala an ginhahalpat nga pugante tikang ha Calbayog City Jail. Ini in katapos la madakop kakulop an duha han walo nga nagpaka-eskapo.
Hadton Lunes, Hulyo 27, 2020, naka-ikyas an walo nga preso dida han bilangguan, pero pagkabuwas, nadakop an duha ngan namatay naman dara han pagpusila hi Edwin Abria.
An mga nagkadadakop kakulop amo hira Nilo Ligason ngan Raul Doroja, nga naatubang hin kaso nga murder. Hira in na-aresto kakulop han udto ha Brgy Cacaransan, Calbayog City.
Tungod hini, tulo nala an ginpipinamiling yana ug ini amo hira Eron Tomboc, Edgar Elbano ngan Eden Albana. Ini nga tulo in murder gihapon an mga kaso.
Natabo an jailbreak hadton Lunes han makatiempo an mga preso samtang nasasagipo an duha nga gwardya ha pag-areglar han pagdeliber han tubig ngadto han City Jail.
Ginlaknit na ha pwesto an Jail Warden samtang gindudumara an imbestigasyon han nasabi nga insidente. #
