Isumat.com/3:25PM, July 15, 2020
Pagsusulod han ikaduha nga parte han tuig, nagigin target han mga bagyo an Eastern Visayas, sanglit yana nga bulan, tim-os na an panalinguha han DSWD-Regional Office nga makagtirok hin bastante nga relief goods basi pirmi andam panhatag ingkaso may mga kalamidad labi na gud an bagyo.
Ha kada sugad man gud hini nga panahon, tikang Hulyo tobtob Disyembre, sugad-sugad nga gintutumbok han mga bagyo an Sinirangan Bisayas.
Hinungdan hini, an DSWD in nagtikang na pagtirok hin relief goods basi makasapar han panginahanglan. Subay han report han ahensya, tobtob han Hulyho 11, nakahimo na hira hin haros 17 Mil nga Family Food Packs (FPP). An Regional Resource Operations Section in waray hunong an trabaho basi makatuman han target nga 30 Mil nga FPP. Pinaagi hini, pirmi andam an ahensya paghatag han ayuda ha mga LGUs nga apektado han kalamidad.
An DSWD in may bag-o nga bodega han ira relief goods nga namumutang ha Palo, Leyte. Sumala kan Rey Penaranda, Administrative Asst han Resource Section, nagin malaksi an ira paghimo han FPP tungod han bag-o nga ekipahes dida han ira assembly-line system.
An kada Family Food Pack in ginkokomponer hin unom ka kilo hin bugas, napulo nga de-lata, unom ka sachets hin kape, ngan gatas.
Iginpapasabot han DSWD nga deri puede igbaligya hin bisan hin-o ini nga mga hinabang tikang han gobyerno. #
