Isumat.com/7:30AM, July 16, 2020

Katapos hin pira ka adlaw nga waray bag-o nga COVID Case ngan paka-recover han nabibilin nga mga pasyente, napayungan na liwat hin dako nga paki-ana ngan pagkabaraka hin kadam-an nga Taclobanon an nahireport han DOH nga bag-o nga natapnan han kagaw nga residente han syudad.

An DOH in nagpasamwak kakulop (Hulyo 15) hin tulo nga bag-o nga kaso ha Region 8, kun diin usa ha ira in 21-anyos nga babaye nga taga Tacloban, samtang an duha nga iba in taga Calbiga, Samar nga mga Locally Stranded Individuals tikang ha Manila.

Nagmamalatumat an anunsyo han DOH nga ini nga Taclobanon in waray pagbiyahe ngadto hin mga lugar kun diin damo an kaso han virus. Hiya in pira pala ka adlaw tikang maghinglaw ug naka-admit yana ha EVRMC. Hinungdan hini, nalutaw an posibilidad nga iginkahibalag o iginka-upod-upod hiya hin nagpositibo han virus. Kun amo ini an rason, matatawag ini nga local transmission. Ini nga anggulo an pag-iimbestigaron yana han DOH ug an Tacloban City Health Office.

Kun manunumduman, mayda na natabo hanhadi nga mga local transmission ha La Paz, Burauen ngan Hilongos kun diin may nagkatatapnan nga mga residente nga waray travel history. Naka-recover hira tikang han infection han virus pero waray pahayag tikang ha DOH kun diin hira pakapurot han kagaw o hin-o an nakatapon ha ira.

Dara han bag-o nga tulo nga nahidugang, umabot na ha 656 an natapnan han virus ha Eastern Visayas ngan nagpapabilin nga 610 an recoveries kay waray bag-o nga naka-recover kakulop. 43 an Active Cases ngan tulo ka tawo an tumalikod ha kadayunan tungod han COVID-19.

Iginpasamwak pa han DOH nga 108 an mga health workers nga natapnan ngan duha nala ha ira an naka-isolate kay an iba naka-recover na. Tulo naman nga PNP personnel an natapnan pero an duha in nakatalwas na gihapon tikang han virus. #