Isumat.com/8:45AM,June 20, 2020
Na-aresto han mga tinubyanan han balaud in usa nga Sangguniang Kabataan (SK) Chairman ngan usa nga parag-uma dara hin magkalain nga rason ngan lugar han panhitabo.
An kapulisan han Caibiran ,Biliran in nagdakop kan Allen Llorono, 20 anyos, waray asawa ngan SK Chairman han Brgy. Bariis han nasabi nga bungto.
Dida han imbestigasyon, hi Llorona in nakainom hadto nga takna han Hunyo 16 ngan nagpipinanngayat hin agway harani han baybayon ha Brgy Looc. Iginreport ini han mga residente ha Caibiran PNP ngan kadagmitan nagresponde an mga pulis.
Na-aresto an suspetsado ug nakumpiskar ha iya in .38 kalibre nga pistola ug lima nga bala. Waray nahipakita nga dukumento an suspetsado kasumpay han iya dara nga pusil. Iginpaslak hiya ha karsel ngan maatubang han kaangayan nga kaso kontra ha iya.
Didto naman ha Basey, Samar, usa nga parag-uma an ginsikmit han mga operatiba han Basey PNP dara han alegasyon nga panlugos hin 6-anyos nga babayehay.
An suspetsado in ginkilala ngahi Edgardo Abiertas, 39-anyos ngan nag-uukoy ha Brgy Roxas. An kag-anak han biktima an nagreklamo ha kapulisan nga pira na ka beses nga ginpalamadya-an an ira anak han suspetsado yana nga tuig. An katapusan nga panlugos in natabo dida han Hunyo 16.
Gintatarhog han suspetsado an bata basi deri magsumat ha iya kag-anak, pero nadiskubre han kag-anak an natabo. Didto daw natatabo an panlugos ha balay han suspetsado.
An suspetsado in maatubang han kaso nga Multiple Statutory Rape. #
