Isumat.com/4:00AM, June 20, 2020

Kun may makangingirhat nga pelikula hadto nga “Friday the 13th,” mayda liwat “13 ha Biernes” ha Eastern Visayas tungod han COVID-19.

Kakulop nga adlaw, Biernes, nakagrehistro an Sinirangan Bisayas hin bag-o nga 13 nga Positive Cases han ginkakahdalukan nga kagaw, sanglit hapagkayana umabot na ha 357 katawo ha rehiyon an natapnan hini.

Amo ini an an resulta han mga nagpositibo nga ginproseso han Eastern Visayas Regional COVID-19 Tesrting Center: 4 nga kaso ha Tacloban City; 2 ha Calbayog City; ngan tag-urusa an Villareal, Samar; Bato, Leyte; Sta Fe, leyte; Tanauan, Leyte; La Paz, Leyte; Jaro, Leyte ngan Caibiran, Biliran.

An bag-o nga 4 nga kaso ha Tacloban in ginkokomponer hin 2 nga Health Care Workers, 1 nga Returning Resident ngan 1 nga tawo nga mayda exposure hin health care worker. Dara hini, umabot na ha 26 an Positive Cases han syudad ngan duha an naka-recover.

Didto naman ha Calbayog, an nahidugang ha lista amo in usa nga Locally Stranded Individual tikang ha Cebu ngan usa nga OFW. Umabot na 7 Positive Cases an nahipatik ha Calbayog.

An Santa Fe ngan Caibiran an mga bungto nga syahan nga nakarecord han ira kaso han corona virus.  Tobtob han ginsusurat in inga notisya, waray pa makahikay hin impormasyon an Isumat.com tikang ha Sta Fe, samtang an taga Caibiran in usa nga OFW nga taga Brgy Palanay.

Didto naman ha Tanauan, Leyte, an bag-o nga positibo in usa nga nagtatrabaho ha DOH Provincial Office. An LGU-Tanauan in maghihimo hin contact tracing yana nga adlaw para hini nga pasyente ha Brgy Bangon, sanglit igin-lockdown hin 24 oras an barangay. Ini an ika-upat nga kaso dida han bungto.

Ha luyo nga bahin, waray pa iginhatag nga impormasyon an mga LGUs han Jaro, Bato ngan Villareal.

Dida han 357 nga natapnan ha Eastern Visayas, haros ngatanan ini mild cases ngan 37 na an naka-recover.

Gin-iimbestigar pa gihapon yana han DOH kun COVID-19 ba an hinungdan han kamatay han 65-anyos nga lalaki ha Kawayan, Biliran kay an iya swab sample in ginkuha ha iya han patay na hiya, ngan mayda pa hiya iba nga sakit. # (KEVIN SIOSANA)