Isumat.com/7:50AM, June 18, 2020
Nahipatik an syahan nga COVID Positive Case nga binawi-an han kinabuhi ha Eastern Visayas.
Iginreport ni Mayor Rodolfo Espina han Kawayan, Biliran nga an 65-anyos nga lalaki nga umuli tikang ha Manila an tumalikod hin kadayunan hadin maagahon han Hunyo 14 ngan iginlubong dayon pagka-alas 5 han kulop hadto mismo nga adlaw.
Dida han Hunyo 13 han aga, ginkuhaan hin swab sample an pasyente, ngan nasabtan nga positibo hiya han COVID-19 paghagos pa hin duha ka adlaw tikang han iya kamatay.
Iginpatapod naman ni Espina nga ngatanan han personales han funeraria, barangay, LGU ngan pamilya han biktima nga nag-asister han paglubong in naka-sul-ot han kumpleto nga Personal Protective Equipment.
Kasumpay hini, gin momonitor gihapon yana han LGU an misis han namatay kay senior citizen gihapon ngan mayda iba nga sakit. Positibo gihapon hiya han corona virus.
Hadin nakalabay nga semana, umabot an grupo hini nga namatay tikang ha Manila sakay hin pribado nga behikulo. Upod niya an iya misis, usa pa nga senior citizen, duha nga menor de edad ngan usa nga babaye nga aada ha igo nga pangidaron. Deretso ini hira ha Home Quarantine Brgy Inasuyan, Kawayan. An misis nga nag positibo gihapon in iginbalhin na ha Isolation Unit han LGU.
Ginbubuhat yana han LGU an contact tracing han posible nga iginka-urusa han grupo samtang naka Home Quarantine hira.
Gin-aaghat naman ni Espina an mga bungtuhanon nga magpabilin nga sundon an mga kamanduan basi makalikay han virus sugad han deri pag ginawas-gawas han balay, pagsul-ot hin face mask, pirmi magin malimpyo an lawas ngan physial distancing. # (KEVIN SIOSANA)
