Isumat.com/8:15AM, June 18, 2020

Pira pala ka oras an nakalabay, iginmando ni Mayor Luz Ponferrada an “lockdown” ha bug-os nga bungto han Basey, Samar.

Ini an nagin panguna nga aksyon han LGU tungod han nahirecord nga 20 nga residente han bungto an nag positibo han COVID-19 subay han swab testing results nga ginpagawas kagab-i han DOH-Regional Office.

Hi Ponferrada in nagsering nga yana nga adlaw, Hunyo 18, 2020, ngatanan nga tawo han bungto in deri ginpapagawas ha ira panimalay. Iginmando gihapon han alkalde nga suspendido an trabaho han mga empleyado han LGU ug nagtatrabaho ha pribado nga sektor.

An mga negosyo ngan tindahan an minanduan gihapon nga magsara la anay samtang nagkaka-ada pa hin pagtirutimbang han sitwasyon an mga lideres han munsipalidad. Ini nga kamanduan in magpapabilin tobtob nga magkaada na hin bag-o nga kasugu-anan hi Ponferrada.

Tobtob han ginsusurat ini nga notisya, waray pa maghatag hin detalye o impormasyon an LGU kun tikang ha iba nga lugar o OFW ba ini nga mga Positive Cases.

Kadungan hini, deri na gihapon madadayon an Tacloban-Basey Balyu-an Rites. Ini nga kada tuig nga tradisyon in gindudumara han Tacloban ngan Basey ha kada Hunyo 20 kun diin magbabalyu-ay han imahe han Sto. Nino an duha nga lugar. Ini unta an pagtikang han kada adlaw nga Novena para han pagsa-urog han kapistahan ni Senor Santo Nino han Tacloban kada Hunyo 30.

Ini nga desisyon in ginkasarabutan tungod han nagpapadayon nga krisis ha panlawas tungod han corona virus pandemic. #