Isumat.com/9:45AM, June 3, 2020
Nasikop han mga tropa han gobyerno in usa nga lider han New Peoples Army ngan duha nga iya ka-updanan ha Brgy Epaw, Las Navas, Northern Samar.
Sumala han report, an mga kasundalohan han 803rd Infantry Brigade in nagdumara hin pagpatrolya didto han mao nga lugar dara han sumbong han mga residente nga gintitinarhugon hira han mga rebelde nga komunista nga nagkokolekta hin kwarta ngan pagkaon tikang han mga baryuhanon.
Dida han nasabi nga operasyon han militar, nagkadadakop hira Carlos Baluyot alias Ka Kris, Albino Lucapa alias Ka Ebin ug an menor de edad nga Jake dela Cruz alias Ka Anda. Na-aktuhan hira han militar nga nagtatanum hin bomba dida han aragi-an ngadto han baryo.
Iginmalatumat han militar ngahi Ka Kris in aktibo nga lider han White Area komo chairman han Alyansa san mga Parag-uma Kontra Kagutom san Las Navasnon (APKLAS) nga nakikigsumpayan han Red Area (NPA) ha Northern Samar.
Nakumpiskar tikang han mga rebelde in usa nga kalibre .45 nga pistola, duha nga Improvised Explosive Device, ngan subersibo nga mga dokumento. Nakuha gihapon han militar tikang kan Ka Kris in kwarta nga 25 Mil pesos. Nagsumat hi Ka Kris nga an salapi in gagamiton pagpalit hin mga bomba subay han sugo ha iya ni Ka Martin.
An mga nagkadadakop nga rebelde an gin-turn-over han Philippine Army ngadto ha Northern Samar Police para han kaangayan nga pagpasaka hin kaso.
Hi LtCol Juan Gullem, Commander han 20th Infantry Batallion in nanawagan ha mga rebelde han nasabi nga probinsya nga maanhunahuna hin maupay ngan deri magpadara han magtam-is nga mga saad han ira lider, lugod mas maupay kun bumalik hira ha piyod han balaud.
Ha luyo nga bahin, hi Col Lowell Tan, pinuno han 803rd Infantry Brigade in nasusubo hini nga kahimtang han nadakop nga mga NPA. Sering pa niya, imbes nga magkaka-urusa an ngatanan yana nga panahon han krisis, naghihimo lugod hin deri makatawo nga mga binuhatan an mga rebelde. Iya iginsaad ha mga rebelde nga an Philippine Army, pinaagi han Enhanced Comprehensive Local Integration Program, in dako an mahibubulig para han pagpatikang hin bag-o ngan mamurayaw nga kinabuhi para han masurender nga mga rebelde. # (KEVIN SIOSANA)
