Isumat.com/9:52AM, June 2, 2020
Mayda tulo ka tawo nga nahidugang han listahan han natapnan han corona virus ha Region 8. Ini an iginpasamwak han DOH Regional Office yana nga aga. Tungod hini 43 na katawo an nag positibo han kagaw ha aton rehiyon.
Hi EV Patient # 41 in usa nga lalaki, 43 anyos ngan taga Burauen, Leyte. Sumala han DOH, waray travel history ha iba nga lugar ngan waray contact hin iba nga nag positibo ini nga lalaki.
Hi EV Patient # 42 in taga Abuyog, Leyte. Usa hiya nga OFW nga babaye, 35 anyos nga sakay han Air Asia Flight nga umabot ha Tacloban hadton Mayo 27.
Samtang, an EV Patient # 43 in taga Baybay City, 33 anyos nga babaye nga OFW. Hiya an iginkadungan han flight hadton Mayo 25 han mga nag positibo tikang gihapon ha Baybay ngan Hilongos, Leyte.
Waray pa igka-urusa ha ira tagsatagsa nga pamilya ini nga mga pasyente ngan aadto ha mga Isolation Centers.
Ini nga mga resulta han ira swab samples in tikang ha EVRTC ngan Divine Word Hospital. # (KEVIN SIOSANA)
