Isumat.com/2:59PM, May 31, 2020
Tinikangan buwas, Hunyo 1, 2020, pira nga barangay han Tarangnan, Samar in igpapa-ilarum na ha Modified General Community Quarantine (MGCQ), ug an mga residente han nasabi nga mga barangay in puede na gumawas han bungto basi magpakabuhi ngan para han importante nga mga transaksyon.
An alkalde han bungto ngahi Arnel Tan in nagpahayag nga ini in subay han kamanduan han pamunu-an han probinsya nga an bug-os nga Samar ug pira nga barangay ha Tarangnan in igpapailarum na ha MGCQ tikang buwas tobtob Hunyo 15. Pero Ginklaro han mayor nga an mga barangay nga masasakop han MGCQ amo an nakonsiderar nga talwas na ha corona virus.
Magpapadayon naman an implementasyon han Enhanced Community Quarantine ha masunod nga mga barangay: Poblacion A, B, C, D, E, Imelda ngan Palencia. Ini nga mga lugar in mayda pa aktibo nga mga kaso han virus ngan gin-oobserbaran pa kun magkakamay-ada hin bag-o nga kaso han ginkakahadlukan nga kagaw.
An mga residente han iba nga barangay in puede na pumakadto ha Calbayog ngan Catbalogan, pahayag pa ni Mayor Tan, pero kinahanglan importante an rason han pagbiyahe ngan may dara nga mga dokumento nga magpapamatuod nga waray katapni han virus. Puede gihapon pumasada an pampubliko nga sarakyan tikang han bungto pero limitado an mga pasahero.
Igindederi gihapon para han mga mangurukoy hini nga MGCQ Barangays nga pumakadto o sumulod han mga barangay nga gintudlok nga deri pa COVID free. Nagpapabilin an liquor ban ha bug-os nga bungto ngan deri puede an pagkatitirok hin kadam-an nga mulopyo ngan closed contact sports bisan aada na ha MGCQ an lugar.
Igindig-on ni Tan nga bisan aada na MGCQ ini nga mga barangay, deri ini pagtugot para hin paglakwatsa o pamasyada. Ginhihimo ini basi makagpakabuhi na an mga bungtuhanon ngan dumalagan an ekonomiya han munisipalidad.
Iya gihapon minanduan an mga kapitan han barangay nga igpatuman an mahugot nga monitoring han mga tawo nga magkaka-uli ha ira lugar tikang ha Manila o iba pa nga syudad nga damo an natapnan han virus. Kinahanglan dad-on ha Isolation Facility han bungto an mga magkaka-abot para han kwarentina. An deri sumugot in aarestuhon han kapulisan ngan sasampaan han kaangayaan nga kaso.
An DOH-Regional Office in nagdeklarar nga nagkaada hin community transmission han virus dida han mao nga bungto duha na ka bulan an nakalabay. Tobtob han ginsusurat ini nga notisya, porlomenos 28 na nga Tarangnanon an natapnan pero maabot na hin napulo ka tawo an naka-recover. An iba in maupay an panlawas samtang aadto ha mga Community Isolation Units han Bungto. Gintotoohan nga an nagdara han virus ngada han bungto amo an lalaki nga taga Calbayog City nga amo an ikaduha nga nag positibo han virus ha Eastern Visayas. # (KEVIN SIOSANA)
