Isumat.com/3:01PM, May 25, 2020
Ginhahalpat na yana han mga kapulisan han Paranas, Samar in tulo nga mga sundalo dara han alegasyon nga nagpabuto han ira armas de fuego samtang nag-iirignom ngan naka-igo hin duha nga sibilyan.
Sumala han report nga nakadangat ha PNP Regional Office, mayda tulo nga sundalo nga kaapi han 46th Infantry Batallion an nagtatagay-tagay ha panimalay hin residente han Barangay San Isidro, Paranas, Samar. Usa han mga sundalo in ginkilala ngahi Cpl Jover Mabaga, samtang waray mahisumat an pangilal-an han duha niya nga ka-tropa.
Sugad-sugad nga nagpanunubra na an kalipayan dida han alsa-baso kay maaringasa na an nag-iirignom ngan nakaka-arimutaw na han mga pag-aramyaw. Hinungdan hini, an tanod ngahi Marcelino Nacar in pumakadto han balay kun diin nag-iirignom an grupo ngan iya ginsaway dara han ira kama-aringasa.
Dida hini, tigda nga nagkagawas an kasundaluhan nga nagpabuto ha dereksyon ha tuna. Pero lumasik an mga punglo ngan naigo hi Nacar ug an parag-uma nga hi Teodorico Cinco nga na-agi la unta dida han lugar han matabo an insidente.
Hi Nacar in naigo ha iya wala nga butkon, samtang an 65-anyos ngahi Cinco in nag-antos hin igo hin bala ha iya irok, tiyan ngan wala nga tiil. Kadagmitan gindara an duha nga samaran ha hospital basi pagtambalon.
An mga suspetsado in kadagmitan kumalagiw ngan yana ginpipinamiling pa han kapulisan.
An 46th Infantry Batallion in waray pa maghatag hin pahayag kasumpay hini nga panhitabo kun diin nadadabi an ira mga kasundalohan. # (KEVIN SIOSANA)
