Isumat.com/2:49PM, May 14, 2020
Sumampak na ha katuna-an hi Bagyo Ambo ug an bungto han San Policarpo ha Eastern Samar amo an syahan nga lugar kun diiin nag landfall an bagyo alas 12:45 an oras yana nga kulop.
Dida han gibabag-uhi nga update han PAG-ASA nga ginpagawas alas 2 yana nga kulop, kataliwan han landfall ha San Policarpo, an mata han bagyo in namumutang harani han Oras-Jipapad Area. May kakusgon ini nga hangin ha sentro nga 155km/hour ngan surusubasko nga 190km/hour.
Tobtob han ginsusurat ini nga notisya, ginpapaningkamutan pa han mga otoridad han gobyerno nga makakuha hin mga report kasumpay han danyos han bagyo. Tikang pa kanina han aga, ginbayo na hin makusog nga hangin ngan na-eksperiensyahan in grabe nga uran ha bug-os nga lalawigan.
Dida hin usa nga interview han media alas 2:30 yana nga kulop, hi Eastern Samar Governor Ben Evardone in nagpahayag nga waray pa niya igka-istorya an Mayor ha San Policarpo tungod kay nautod an mga linya han komunikasyon.
Nagsumat gihapon hi Evardone nga nahilaprak an bubong han gymnasium ha bungto han Maslog. Kadam-an liwat nga munisipalidad in waray suplay han kuryente.
Ginsuspsnder an trabaho han bug-os nga probinsya kanina han aga antis pa mag landfall hi Ambo. Nagdumara gihapon hira hin forced evacuation ha pira nga bungto. An national highway nga nagsusumpay han Eastern ngan Western Samar in iginsarado ha trapiko tungod kay landslide prone area ini.
Hi Evardone in nagsumat gihapon nga apektado an mga ginhimo nga Isolation Facilities para han Balik-Probinsya Program kay an iba hini nagin evacuation centers yana.
Aminado an gubernador nga posible magkulang yana han relief goods kay duha na ka bulan an ira distribusyon ngadto han mga residente nga apektado han corona virus lockdown. Pero iginpatapod niya nga waray gugutumon ha ira probinsya kay hihimoon han iya pamunuan an ngatanan basi mabaton an mga panginahanglan han katawhan.#(KEVIN SIOSANA)
