Isumat.com/10:01AM,May 14, 2020

Usa nga miembro han New Poeple’s Army (NPA) an namatay dida hin engkwentro ha butnga han mga sundalo han gobyerno ug grupo han rebelde nga kumunista ha Pinabacdao, Samar hadin nakalabay nga adlaw.

Dida han report tikang ha 8th Infantry Division han Philippine Army, nagkasurapo ha Brgy Layo an duha nga hugpo ngan umabot hin 10 minutos an pabarubalyo hin bala.

An mga tropa han gobyerno in kaapi han 46th Infantry Batallion nga nakig-away kontra hin porlomenos lima nga mga rebelde. Umiskapo an mga rebelde kataliwan han pinusilay ug ira ginbayaan in usa han ira kaupdanan nga binawi-an han kinabuhi.

Nakarekupo naman an kasundaluhan hin usa nga M-16 rifle ngan mga granada.

Waray nahireport nga namatay o nasamaran ha panig han pwersa han gobyerno.

Duha pala ka semana an nag-agi, nakarekupo gihapon an kasundaluhan hin upat nga Improvised Explosive Devise ha ligid han national highway ha Pinabacdao nga gintotoohan gagamiton unta hin pag-ambush.

Ha atubangan hini nga panhitabo, padayon naman an panawagan han pwersa armada han Pilipinas ngadto han mga rebelde nga bumalik na ha piyod han balaud ngan makatagamtam han mga programa han gobyerno basi maghinga-upay an ira kinabuhi. # (KEVIN SIOSANA)