Isumat.com/2:55PM,April 29, 2020
Nagpapadayon an paningkamot han Department of Social Welfare and Development ug an mga Local Government Units ha Sinirangan Visayas nga mahatag na an cash assistance ha mga benefeciaryo ha ilarum han Social Amelioration Prograam (SAP) han gobyerno ha panahon han COVID-19 crisis.
Tobtob yana nga adlaw (Abril 29) umabot na ha 94 nga mga LGUs ha Rehiyon Otso an nagdumara na han pay-out ngadto han kwalipikado nga mga mulopyo. Ini nga mga LGUs in tikang ha Northern Samar (5), Western Samar (19), Eastern Samar (22), Leyte (31), Southern Leyte (14) ngan 3 ha Biliran.
An mga nagpakakarawat in umabot na hin 127,708 nga pamilya ug an ayuda pinansyal nga nabukalsan in 732,095,000 pesos. Tag Singko mil pesos an na-aagoman han kada pamilya nga kwalipikado ha ilarum hini nga programa han gobyerno.
Ginlalauman naman nga magtitikadamo pa nga beneficiaryo an makakatagamtam hini kay mayda ba sobra kuarenta nga LGUs an manhahatag ha masunod nga mga adlaw. An mga LGUs in ginmanduan nga kinahanglan mahatag na ini yana nga Abril.
An SAP amo an pagbulig han gobyerno ngadto han mga pamilya nga derekta ug dako an epekto han ginpatuman nga kwarentina. Ginlalakipan ini han mga low-income families, upod na an mga PWDs, senior citizens ngan solo parents.
Ginsasagdunan han DSWD an mga mulopyo nga kun mayda mga reklamo o mga problema mahitungod hini nga programa, makigsumpayan hira han ahensya pinaagi han masunod nga mga hotline numbers han DSWD-Regional Field Office 8: 0919-061-6013, 0919-061-6014, 0919-061-6015, 0919-061-6016. #
