Mayda nahidugang nga positibo nga kaso han COVID-19 ha Eastern Visayas sanglit pito na ka tawo an natapnan han virus tikang ha Rehiyon Otso.
Dida han press conference nga gindumara han DOH-Region 8 yana nga kulop, iginpasamwak han ahensya nga an gibabag-uhi nga COVID patient ha Eastern Visayas amo in 25-anyos nga babaye nga taga Burauen, Leyte. Ini nga babaye in close contact han Patient No. 5 nga tikang han nasabi nga bungto.
Hinsabutan nga magka-usa hin balay hira nga duha. Hi patient No. 7 in umangkon ni Patient No. 5. Nagpakita hin sintomas ini nga bag-o nga pasyente hadton Abril 18 ngan iginpailarum hin kwarentina ha isolation facility han LGU. Igbabalhin hiya ha Burauen District Hospital. Aada ha maupay nga kahimtang an panlawas han pasyente hapagkayana, sering pa han DOH.
Ini nga gibabag-uhi nga positibo amo in lakip dida han Batch 11 han swab samples kun diin 35 ini nga samples nga ginpadara ngadto ha Cebu para han confirmatory test. Dida han 35 nga samples, hiya la an nag positibo.
Tobtob yana nga adlaw, Abril 24, pito na ka tawo an nagpositibo han corona virus ha Region 8. An syahan nga upat in naka recover na ngan nakagawas na ha hospital. Tulo naman an nagpapabilin ha hospital.
Samtang, an Batch 12 han swab samples in igpapadara na ngadto ha Cebu para han confirmatory test ug ginkokomponer ini hin 113 nga samples. #
