Isumat.com/3:01PM,April 24, 2020

Kumarawat hin ayuda pinansyal tikang ha Department of Labor and Employement (DOLE)- Region 8 an maabot 3,800 nga mga obrero ha Eastern Visayas.

Tag Singko Mil pesos an natagamtaman han nasabi nga mga trabahador nga nawarayan hin trabaho dara han krisis durot han COVID-19.

An mga kompaniya o tindahan kun diiin nagtatrabaho ini nga mga obrero in waray na makagpadayon han ira operasyon ug an iba naman in temporaryo nga ginsuspender an ira operasyon dara han hulga han corona virus.

Nagpahayag hi Norma Rae Costimiano, tagyakan han ahensya, nga dida han Abril 15 natapos na an pangarawat han DOLE han mga aplikasyon hini nga cash assistance. Pero iya ginklaro nga hapagkayana, mayda pa mga aplikasyon nga ginpo-proseso ngan ha deri maiha nga panahon, ma-aaprobaran na ini.

Dida han report han DOLE tobtob kaukulop, 294 nga mga business establishments an natangdu-an han ahensya an mga aplikasyon nga nakakasakop hin 3820 nga mga magtatrabaho. #