Isumat.com/3:19PM, April 22, 2020
“Magpapabilin an istrikto nga kwarentina ha Tacloban kun ngatanan nga COVID Positive Patient han rehiyon in dadad-on nganhi ha syudad,” ini an igindig-on ni Tacloban City Mayor Alfred Romualdez.
Dara hini, emosyonal nga nanawagan hi Romualdez ha Department of Health nga deri dad-on ha EVRMC-Magsaysay (Tacloban) an ngatanan nga tawo nga nag positibo han COVID-19.
Dida han press conference han alkalde yana nga kulop, iya iginsumat nga nakikigsumpayan hiya kan Health Secretary Francisco Duque para iya igpabati ini nga isyu. Matuod tobtob kanina, waray pa hira magkahimangraw.
Para kan Romualdez, dako hin duro an epekto ha panginabuhi, ekonomiya, trabaho ngan edukasyon ha Tacloban ngan bug-os nga rehiyon kun ngatanan na la nga COVID Positive in dadad-on ngan pagtatambalon ha EVRMC. Sumala pa ha iya, deri mabubulkas an Enhanced Community Quarantine ha Tacloban kun padayon nga magkaka-abot nganhi ha syudad an tanan nga positibo han virus.
An suhestyon ni Romauldez ha DOH amo ini: kun deri man grabe an kahimtang ngan maupay an panlawas han pasyente, igpabilin ini ha ira lugar o provincial hospital ngan ig-isolate kay akos man ini buhaton. Iya ngani iginpananglitan an iba nga pasyente nga magkusog man ug mahimsog an panlawas, ug puede ini deri na dad-on ha Tacloban tobtob nga maka recover.
Pero ginklaro niya nga abri liwat an syudad han mga pasyente nga deri maupay an kabutangan ngan deri na akos han mga facilidad ha mga provincial hospital.
Kun aanhi ngatanan an COVID Positive patient ha Tacloban, mahitaas gihap an peligro nga puede matapnan an mga health workers nga taga denhi ha Tacloban. Kun matabo ini, magtitikadako an kadelikaduhan nga magsarang an virus ha bug-os nga syudad, pahayag pa han alkalde.
Hi Romualdez in nagdig-on nga kun magpadayon ini nga sitwasyon, magpapabilin nga paralisado an Tacloban, ug an epekto hini paralisado gihapon an bug-os nga Eastern Visayas kay an Tacloban man an sentro han ekonomiya ngan edukasyon han rehiyon.
Plano unta han City Government nga magkaada na hin major changes katapos han Abril 28, pero kun amo la gihapon ini an proseso han DOH, deri madadayon ini nga plano han syudad.
Tobtob nga ginsusurat ini nga notisya, waray pa reaksyon an DOH hini nga panawagan ni Romualdez.
An DOH an nagtudlok han EVRMC nga amo an referral hospital para han mga COVID Positive ha bug-os nga Region 8. #
