An Provincial Health Office (PHO) han Eastern Samar in naghatag hin pagklaro ngadto ha publiko kasumpay han dako nga pagkabaraka dara han pagka-abot hin mga sundalo ngadto han probinsya tikang ha Burauen, Leyte.
Kakulop, Abril 17, iginpasabot han DOH-Regional Office nga an ikalima nga COVID Positive Patient ha Eastern Visayas in tikang ha Burauen, salit man pagkahadlok an gin-abat han kadam-an kay han una nga semana nagka-abot an mga kasundalohan tikang ha Burauen.
Subay han impormasyon nga nakuha han isumat.com, nagbalyo hin assignment in duha nga batalyon han Philippine Army. An 78th Infantry Batallion nga nakadestino ha Burauen an iginkabalyo han 14th Infantry Batallion ha Eastern Samar.
Kakulop, kadagmitan nagpasamwak an PHO nga ira na ginpanginano ini nga isyu ug hinsabutan nga mayda gud man bag-o nga nagka-abot nga mga sundalo ha Eastern Samar, pero deri ngatanan in tikang ha Burauen ngan katorse la nga sundalo an tikang han nasabi nga bungto ha Leyte.
Igindugang pa han PHO nga dida pala han pag-abot han mga sundalo han nag-agi nga semana, ira na ini gin-abisuhan nga mag kwarentina ha ira kampo. Ug ngatanan nga nagka-abot ginpa-kwarentina upod na an 14 tikang ha Burauen. An medical group han Philippine Army amo an nag momonitor ha ira, pahayag pa han PHO.
Nagsering pa an PHO nga waray deployment nga matatabo kun waray pa clearance katapos han isolation period. Hapagkayana, ngatanan ha ira in waray iginpapakita nga sintomas han corona virus ug an iba in matatapos na an panahon han isolation.
Ginklaro pa han PHO nga an kampo han mga sundalo ha Burauen in 10 kilometros an kahirayo tikang han barangay han COVID-19 patient, ug waray bisan usa nga sundalo nga iginka-istorya o iginka-urusa han pasyente.
Ginpasalamatan gihapon han PHO an mga kasundaluhan kay upod hira han mga frontliners ha pakigbisog kontra han corona virus. #
(Posted 2:07 PM, April 18, 2020)
