Katapos hin sobra usa ka semana nga waray nadudugang nga positibo han COVID-19 ha Eastern Visayas, nadugangan ini hin usa nga kumpirmado nga kaso han makamaratay nga kagaw.
Dida han press conference nga ginbuhat han DOH-Region 8 yana nga aga, iginpasamwak ni DOH Regional Director Minerva Molon nga an bag-o nga COVID-19 Confirmed Case in tikang ha Burauen, Leyte. Usa ini nga babaye, 58 anyos nga nagbyahe ngadto ha Guam ngan umabot ha Manila hadton Marso 9, 2020.
Hadton Marso 13, umabot ini ha Leyte nga babaye sakay hin pribado nga sarakyan tikang ha Manila. Nagpahayag an DOH nga mayda 16 ka tawo nga upod han babaye dida han ira pagbyahe tikang ha Manila. Hapagkayana, ini nga mga tawo in waray iginpapakita nga sintomas han corona virus ngan mahugot nga ginbabantayan han mga otoridad han panlawas.
Ha report han DOH, an babaye in nagpakita han mga sintomas dida han Marso 23 ngan nagin PUI hiya ug nagpa-ilarum hin home isolation. An iya mga sintomas in nagpabilin bisan kun naglapos na an 14 ka adlaw nga kwarentina. Dara hini, iginpa-ilarum hiya han Rapid Tests ngan nag positibo hiya.
Basi makumpirmar ngan ma-validate an resulta han Rapid Testing, ginkuhaan hiya hin swab sample hadton Abril 13 ngan iginpadara an sample ha Vicente Sotto Memorial Medical Center ha Cebu para han confirmatory test. Pagka Abril 16, gumawas an resulta tikang ha Cebu nga COVID Positive an pasyente. Iginbalhin na ini nga babaye ha EVRMC kagab-i.
Ginbubuhat yana an mahugot nga contact tracing han mga otoridad han panlawas han mga posible nga ginka-istorya ngan iginka-upod-upod hini nga pasyente. Nagsering pa an DOH nga kritikal an sitwasyon yana didto han lugar hini nga pasyente kay aada an posibilidad nga mayda natapnan an pasyente.
Nagpahayag pa an DOH nga deri ini local transmission kay imposible nga denhi ha Region 8 nakakuha han kagaw an pasyente. #
(Posted 9:45 AM, April 17, 2020)
