Waray gud diskanso it panmatay ha syudad han Calbayog…eleksyon, waray eleksyon, mayda COVID, waray kagaw….pero padayon an mga insidente hin krimen kun diin mga kinabuhi an naaanaw.
Dida han nakalabay nga adlaw, naawat an kinabuhi hin usa nga lalaki han paarakan ini hin bala hin waray panhikilal-i nga mga suspetsado ha Brgy. Hamorawon, Calbayog.
An biktima nga ginkilala nga hi Michael Angelo Besorio, 38 anyos, residente han nasabi nga lugar, in tipa-uli na unta sakay han iya motorsiklo han tigda la nga tapu-on hiya han riding-in-tandem nga mga suspetsado ngan pa-uranan hin punglo nga nagin rason han dayon niya nga kamatayon.
Hapagkayana, an kapulisan in nagpapadayon han imbestigasyon basi masabutan an mga responsable hini nga panhitabo.
Ha lain naman nga police report, nag-antos hin igo hin bala in usa nga lalaki nga nagpinasaway ngan umato han kapulisan hinungdan nga napwersa an otoridad pagpusil ha iya.
Subay han report han Municipal PNP han San Roque, N. Samar, hi Nicol Marindoque, 21 anyos, in iginreklamo ha pulis hin usa nga negosyante kay gin-aalegar nga ginbangga-an han suspetsado an sarakyan han negosyante.
Han ginsisita han kapulisan hi Marindoque, nag-isog lugod ngan humulbot hin pisaw ngan ginbuno in usa nga pulis pero waray maigo. Dida hini nga takna, Hi PSgt Loverita in napwersa na nga pusilon an suspetsado ug naigo ini ha paa.
Gindara an suspetsado ha hospital basi pagtambalon ngan nakatalaan umatubang han mga kaso nga igsasampa kontra ha iya. Hinsabutan nga an suspetsado in naka-inom hin makahurubog nga irimnon durante han panhitabo. #
(Posted 8:09 AM, April 17, 2020)
