Dako an posibilidad nga deri na pahilawigon utro ngan bulkason na an kwarentina nga igin-implemantar ha Tacloban City paglapos han Abril 28, 2020.
Kun aton manunumduman, an syahan nga kwarentina in matatapos unta dida han Abril 12, pero gin-extend ini tobtob Abril 28 ha pagseguro nga deri na maglarab an corona virus.
Ini an nagin pasamwak ni Tacloban City Mayor Alfred Romualdez dida han iya pag-atubang ha media han ala-una yana nga kulop, Abril 14. Nagsering hi Romualdez nga an sitwasyon yana ha Tacloban in nagpapakita hin maupay nga senyales basi tapuson na an restrictive quarantine.
Igin-esplikar han alkalde nga dida han monitoring han Tacloban COVID-19 Task Force, nalutaw nga nagtitika-iban na an mga ginsususpetsaran nga natapnan han kagaw ngan waray na liwat nadudugang nga mga positibo han corona virus. Partikular mente nga gintudlok ni Romauldez an Tacloban nga waray bisan usa nga nagpositibo han COVID-19 tobtob yana, ngan iya ginhihingyap nga waray na unta matapnan pa nga iba basi tapuson na an kwarentina denhi han syudad.
Kasumpay hini, utro nga igindig-on ni Romauldez nga kinahanglan magpabilin an panlimbasog han ngatanan nga mga Taclobanon nga magin zero-positive an syudad basi hinay-hinay nga makabalik na kita ha normal nga panginabuhi.
Nagpabati gihapon hi Romualdez han iya tim-os nga pagtapod han mga Taclobanon nga magsusunod han mga guidelines han kwarentina. Iya liwat gin-awhag an publiko nga igpadayon an physical distancing ngan pirmi pagsul-ot han face mask, ngan deri tumagya bisan kun nagtitika-upay an sitwasyon. Sumala pa han amay han syudad, obligasyon han ngatanan nga magburublig labi na ha panahon han krisis.
Sering pa man niya, an gobyerno in nagbubuhat han ngatanan para masolosyunan ini nga problema, sanglit an katawhan in kinahanglan gihapon bumulig pinaagi han kooperasyon ngan pagsunod han mga balaud.
Nanawagan pa hi Romualdez ha publiko nga deri umungay pagpinasarang hin fake news ngan pagdaot hin bisan hin-o ha social media kay waray ini igdudurot nga kaupayan. #
(Posted 3:16 PM, April 14, 2020)
