Sapin-sapin nga mga kaso an aatubangon hin usa nga lalaki dara han panutok niya hin pusil han kapulisan nga naglanat ha iya han waray hiya umukoy dida han checkpoint han mga otoridad ha Javier, Leyte.
Subay han pormal nga reklamo nga iginsampa ni PCaptain Ruben Recilla, hepe han Javier Municipal Police Office, ginkilala an suspetsado nga hi Marvin Margate, 29 anyos, usa nga parag-uma, ngan residente han Brgy. Talisayan han mao nga bungto.
Dida han report han PNP, hi Margate in nadakop kanina han banda alas otso han aga, Marso 29, 2020 katapos niya makigpalanat han mga otoridad. Nagmamalatumat an report nga hadto nga takna, hi Police Officer Rowel Abueva upod an iya mga katropa in nagdudumara han COVID-19 checkpoint han nasabi nga lugar. Nag-asoy hi Abueva nga nakakita hiya hin motorsiko nga ti-abot ha ira checkpoint ngan nagsenyales hiya han driver nga umukoy para igpa-ilarum hiya han thermal scanner subay han kamanduan.
Pero imbes nga sumunod ha kapulisan, tigda lugod nga ginpaspasan han suspetsado an pagpadalagan han iya motorsiklo ngan ginbalewaray an checkpoint. Hi Abueva upod hi PSgt. Michael Jan Tano in kadagmitan sumakay han ira police car ngan ginlanat an suspetsado nga nagpaharurot tikadto ha Brgy Poblacion I han Javier.
Nagsumat pa hi Abueva nga dida pala han checkpoint iya na kilalado an suspetsado nga hi Margate kay dida han Marso 26, umagi gihapon ini dida han checkpoint ngan waray sumugot nga magpa inspection.
Pag-abot han paplanatay ha Poblacion 1, nakasabot an suspetsado nga waray na niya makakadtu-an pa sanglit humaw-as hiya han motorsiklo, ginkuha in usa nga pusil ha iya sling bag ngan igintutok ini ha dereksyon han mga otoridad. Samtang nakatutok an pusil, nagyakan pa hi Margate nga iya papatayon an mga pulis.
Dida hini nga takna, tumawag hin back-up nga pwersa hi Tano ngan naningkamot an kapulisan nga makumbinser hi Margate nga kumalma ngan igtubyan an iya kalugaringon ha kapulisan. Pag-abot han iba pa nga kapulisan amo na an pagsurender han suspetsado ngan nakumpiskar tikang ha iya in usa nga caliber 9mm revolver ngan upat nga mga bala. Kadagmitan hiya ginsikmit ngan gindara ha police station para han kaangayan nga disposisyon.
Hinsabutan gihapon nga waray lisensya an suspetsado pagdara hin pusil subay han panginano han kapulisan han records ha Central Headquarters kun otorisado ba hiya pagdara hin armas de fuego.
An mga kaso nga pag-ato kontra ha mga otoridad ngan pagtalapas han Republica Acta 10591 amo an iginpapa-ilarum na yana hin inquest proceedings han Leyte Provincial Prosecutors Office. #
(Posted 3:20 PM, March 29, 2020)
