Nagpagawas hin mahugot nga pahinumdom an City Health Office han Tacloban ha katawhan nga maghirot gud hin hul-os ngan sundon an mga kasalagdunan han Department of Health kasumpay han COVID-19.
Ini in ha atubangan han unom na katawo nga nag positibo han COVID-19, kun diin an tulo hini in mga Pilipino ug nagdeklarar na an DOH nga nagkaada na hin local transmission an makamaratay nga kagaw. Dara hini, an state of public health emergency an gin rekomendar na han ahensya ha Malacanang ug ini an gin-abuyunan ni Presidente Rodrigo Duterte. Sumala han report, dida hiton Domingo o Lunes, nakatalaan an pormal nga deklarasyon han Pangulo basi igpa-ilaum an bug-os nga nasud ha national health emergency komo pag-andam han possible nga pagtikadamo han mga tawo nga apektado han virus.
Yana nga kulop han Marso 7, nagka-abot gihapon tikang ha Macau, China in 163 nga mga Pilipino nga pira ka semana na-stranded didto hini nga lugar dara han travel ban. Bisan kun waray hira mga sintomas han sakit han ira pag-abot, ginsagdunan hira nga magkaada hin duha ka semana nga quarantine ha ira tagsatagsa nga panimalay ngan dayon pumakadto ha hospital kun may abaton nga maraot ha panlawas.
Kasumpay hini, nananawagan an City Health Office nga igpasabot dayon ha Brgy Health Emergency Response Team kun mayda mga tawo nga nagpapakita hin sintomas hini nga virus labi na kun upod hira hini nga mga Pilipino nga tikang ha Macau.
Ini nga mga Pilipino in nakatalaan umuli ha ira mga lugar, sanglit nagsasagdon an City Health Office ha publiko nga doblehon an paghirot ngan pirmi gud seguraduhon nga maupay an resestensya ngan limpyo an kalibungan ngan lawas.
Dida han Biernes, duha nga Pinoy didto ha Metro Manila an nag positibo han virus, ngan pagka Sabado an misis han usa ha ira in nag positibo liwat. In inga 59-anyos nga babaye aada ha stable nga kahimtang samtang an iya 62-anyos nga mister in kritikal an kondisyon. Bisan kun nadugangan an positive cases ha Pilipinas, an DOH in nagdig-on nga diri angay mag-panic an publiko, lugod tim-os nga paghirot an buhaton ngan deri tomood ngan magpasarang hin peke nga impormasyon tungod han COVID-19. #
