police logoTACLOBAN CITY – Patay na han makit-an ha sakob hin Kasilyas an usa nga lalaki ha Purok Langkaon, Brgy. 3 Upper Nula-tula, Tacloban City.

Ginkilala an biktima nga hi Elias Oquiña y Arceño, 52 anyos an pangidaron, waray trabaho ngan residente han mao nga barangay.

Sumala han informant nga hi Gary Libres y Oquiña, 26 anyos an pangidaron, may live-in partner,residente gihapon han mao nga barangay, ngan umangkon han biktima, nga nakit-an niya an biktima ha sakob han kasilyas ngan iya napansin nga may dugo ini ngan dayon niya nga ginkadto an kag-anak han mao nga biktima.

Dayon naman nga umaro hin bulig an pamilya han biktima ha Brgy. Kapitan ngan ha St. Peter’s Funeral.

Han ginkukuha na an mao nga biktima in naobserbahan han funeral personnel nga mayda mga samad ngan gin-imporma an pamilya han patay nga lawas nga diri la ini natural nga pagkamatay mahitungod han nakit-an nga mga samad ngan tinigbasan ha damo nga parte han lawas han biktima.

Mahuman ini in dayon naman nga dumangop ha mga kapulisan an pamilya han biktima agud nga ma imbestigahan an mao nga panhitabo.

Subay ha pamahayag ni PCInsp Steve Castillote, Hepe han Abucay PNP, nga basar ha ira pagpanginano in posible pinatay  an biktima ngan diri suicide an pagkamatay hini tungod han naangkon nga grabe nga samad ha lawas.

Ha autopsy result in nakag-angkun hin mga laslas ha parte han liog, kamot ngan buno ha Tiyan an mao nga biktima.

Ha pagkayana, in padayon pa an ginbubuhat nga imbestigasyon han mga otoridad agud nga mahisabtan an nagpapaluyo ha mao nga insidente./isumat.com