Igin papailarum yana hin mahugot nga imbestigasyon han Philippine Health Insurance Corporation (Philhealth) in otsenta nga mga ospital denhi ha Sinirangan Visayas ha alegasyon nga may natabo nga ghost claims.
Sumala kan Michael Jibson Hernandez, acting Regional Vice-President han nasabi nga buhatan, onse nga field investigators an nagdudumara yana hin pagsusi ha mga dokumento ngan mga transakyon hini nga mga hospital agud masabtan kun tinood man gud an mga reklamo hin bogus o ginmani-obra nga claims.
Matuod, waray igbuyagyag ha publiko ni Hernandez kun ano in inga mga hospital ngan kun diin ini namumutang, pero iya ginseguro nga magbabaton ha balaud an mga institusyon ngan mga personales nga mapapamatud-an nga nanhidadabi hini nga tinuyaw nga binuhatan. Lakip dida han mga matatabo kun maprobaran nga may anomaliya amo an pagkanselar han akreditasyon han hospital ha Philhealth , diri bagbayad han claims ug an pag-ataubang han kaangayan nga mga kaso.
Ha deri pala maiha nga panahon, hi Philhealth President Ricardo Morales in nagdig-on nga ini nga ira mga pitad kontra han mga pasaway nga hospital in agud maseguro nga magin malinangpuson an ira pagsurapo kontra han mga health providers nga nagpipinan lisbuton. Ha atubangan hini, iya iginpatapod nga diri makokompromiso an pagtagamtam han mga miembro han ira benefecio tikang han ira buhatan.
Hadin nag-agi nga tuig, nahisumat ha mga mantalaan nga binilyon-bilyon ka pesos an nawara ha Philhealth dara hin tinuyaw nga mga transakyon sugad hin overpayment han claims. Usa han gin-aadman yana han ahensya amo an pag implementar han biometric system ha ira mga transakyon basi masayon masabtan ngan makontak an mga miembro nga nagawas an mga ngaran dida han mga claims tikang han mga hospital. #
