Isumat.com/8:41AM, May 25, 2020
Nagtitikadamo na an mga Overseas Filipino Workers nga nakabalik na ha ira tagsatagsa nga lugar denhi ha Sinirangan Bisayas.
Sumala han report han Philippine Information Agency (PIA-8), nagsumat an Overseas Workers Welfare Administration (OWWA) nga 76 na nga OFWs an nakadangat ha aton rehiyon tobtob han Mayo 23, 2020.
An gibabag-uhi nga grupo hin OFWs nga ginkokomponer hin 33 ka tawo an umabot dida han Sabado, Mayo 23. Ini nga batch in na-stranded hin sobra usa ka bulan ha Manila tikang han ira pag-abot.
An syahan nga batch in umabot dida han Mayo 10 nga mayda 19 nga OFWs. An ikaduha nga grupo in ginkokomponer hin 24 ka tawo nga naka-uli hadton Mayo 19. Ini nga syahan ngan ikaduha nga grupo in didto ha Cebu na-stranded.
Sumala pa han impormasyon, antis hira pabalikon, nagkaada na han katorse ka adlaw nga kwarentina ngan negatibo an resulta han ira swab test.
An pagpabalik ha ira lugar in dara han panlimbasog han OWWA Region 7 ngan Region 8, sugad man gihapon han kasugbong nga mga ahensya han Department of Health, Maritime Industry Authority, Philippine Coast Guard, Philippine National Police ngan DILG. # (KEVIN SIOSANA)
