Isumat.com/8:50AM, May 18, 2020
Maabot na hin 700 ka tawo an nagpa rehistro ha panuyo nga makabalik na hira ha Tacloban City tikang han iba nga lugar kun diin na-abtan hira han lockdown nga iginpasunod ha bug-os nga nasud dara han corona virus.
Hi City Administrator Aldrin Quebec in nagsumat nga karuyag na gud hini nga na-stranded nga katawhan nga maka-uli ha ira tagsatagsa nga pamilya ngan makabalik ha ira trabaho.
Pero ginklaro ni Quebec nga ini nga programa amo an Balik-Tacloban ngan deri ini an Balik-Probinsya han National Government. Igindig-on pa han opisyal nga an programa in para gud la han mga residente han Tacloban nga naabtan han lockdown ha iba nga lugar. An Balik-Probinsya in para han katawhan nga nag-ukoy na ha Manila ngan iba nga lugar hin maiha nga panahon nga mabalik ha ira probinsya.
Prayoridad han Balik-Tacloban an mga magtatrabaho denhi ngan mga estudyante nga na-abtan han lockdown.
Ini nga mapapa-ilarum han Balik-Tacloban an magkakaada hin duha ka semana nga kwarentina ha ira balay o ha mga isolation facilities nga gin-andam han City Government.
Ginbabanabana nga magkaka-abot ini nga mga Taclobanon dida hiton Hunyo labi na kun magtikang na an operasyon han mga eroplano.
Kasumpay hini, iginpatapod naman ni Quebec nga ira gud igpapatuman an istrikto nga health protocols para han mga magkakabalik basi kalikyan an pagsarang han makamaratay nga kagaw. Tobtob yana nga mga panahon, an Tacloban in nagpapabilin nga COVID-19 free nga lugar. #(KEVIN SIOSANA)
