Isumat.com/Hunyo 16, 2023
Dako nga sakripisyo an aantuson hin porlomenos 70 ka pamilya nga nagka-uugbaw an mga puy-anan han sunog ha Purok 2, Tzu Czi Village, Brgy Lake Danao, Ormoc City pasado alas 11 han gab-i, Hunyo 14, 2023.
Ha inisyal nga report han Bureau of Fire Protection (BFP)-Ormoc, maabot hin 65 nga kabablayan nagin abo dida han nasabi nga insidente.
Tobtob han ginsusurat ini nga balita, waray report nga may nagkaada hin injury o binawi-an hin kinabuhi han mao nga sunog.
Nagsarang dayon an kalayo tungod kay nagdidirigkit an mga housing units dida han mao nga lugar.
An mga bumbero in padayon pa naghihimo hin imbestigasyob agud matudlok an rason han paglalahinggab ug an kantidad han nadistroso nga kabablayan ngan mga higamit.
An LGU-Ormoc in kadagmitan naghatag hin ayuda ngadto han mga nasunugan.
Nanawagan gihapon an mga biktima hin mga donasyon tikang ha mga bulawanon an kasingkasing nga andam bumulig ha ira.#
