private-armed-group

Calbayog City – Usa nga Task Group an guin porma agud bungkagon iton mga Private Armed Groups (PAGS) ha Samar.

An Regional Special Task Group Samar in guin porma dungan han guin buhat nga pag pirma han Peace Covenant han mga lokal nga opisyal han Samar ngan an mga labaw han PNP AFP ngan han representante han Singbahan.

Sumala hiton records han PNP nga masobra singkwenta na nga shooting incident it nahitabo ha Samar partikular na ha siyudad han Calbayog yana la nga tuig 2015.

Hi Sr. Supt. Isaias B. Tonog amo an guin tudlok nga Task Force head nga amo an may responsabilidad han panakop han guin tutuohan nga mga miemro hin Private Armed Groups han mao nga probinsiya.

Sumala kan Tonog nga kaparte han ira trabaho an pag siguro nga waray na ma poporma nga iba o bag-o nga grupo samtang nga nag titika harani iton 2016 elections.

An iba nga mga guin aalegar nga miemro han PAGS sumala pa kan Tonog in mayda mga pending warrant of arrests ngan an iba hini in nahidadabi pag baligya ngan pag gamit han Illegal Drugs.

Waray pa liwat madig-on nga ebidensiya an mga kapolisan kon hira hin-o nga mga politiko an nag papaluyo han PAGS ha Samar mahitungod nga padayon pa an pag hikay hin mga impormasyon parti hini.

Pamatii an interview kan Police Sr. Supt. Isaias B. Tonog.