Isumat.com/Mayo 30, 2023
Nagka-aawat an kinabuhi hin upat nga mga gin-aalegar miembro han New People’s Army han igkasurapo hira han mga tropa han Philippine Army hadton Domingo han kulop, Mayo 28, 2023, ha Brgy Mabini, Catarman, Northern Samar.
Ha report han 8th Infantry Division han Philippine Army, an mga tropa han 43rd Infantry Battalion in nagpapatrolya didto han nasabi nga lugar han igkahibalag hira han mga rebelde nga kumunista. Nagkaada hin 15 minutos nga pupsilay antis nanngalagiw an mga rebelde ngan ginbayaan an namatay nga ira mga kaupdanan.
Antis hini, an kasundaluhan in nakakarawat hin mga impormasyon tikang ha mga baryohanon nga may armado nga grupo nga nangingikil ha mga sibilyan, amo nga nagdumara hin operasyon an militar.
Labot la han nagkamatay nga rebelde, nakuha gihapon han militar tikang ha lugar han engkwentro an duha nga M16 rifles, duha nga kalibre 45 nga pistola, mga bala ngan personal nga higamit han mga rebelde.
Waray nahireport nga nasamaran ha panig han militar. Iginpahayag pa han report nga posible may mga samaran nga rebelde nga naka-eskapo tungod han mga turo han dugo ha dalan nga ira gin-agi-an.
Nagtotoo an militar nga an mga rebelde in kaapi han grupo Mario Sevillano alyas Durok nga pasimuno hin bayolente nga mga aktibidad han mga rebelde.
Sumala kan 8th ID Commander MajGen Camilo Ligayo, deri unta natatabo ini nga madugo nga engkwentro kun sumugot la an mga rebelde nga bumalik na ha panig han gobyerno. #
