Isumat.com/Oktubre 31, 2022
Naawat an kinabuhi hin upat ka tawo denhi ha Rehiyon Otso tungod han paglapingka ni Bagyo Paeng hadin Oktubre 28, 2022.
Ha Consolidated Report han PNP Regional Office nga iginpagawas kakulop, Oktubre 30, 2022, lakip han mga nagkamamatay in 5-anyos nga bata nga nalumos samtang nagkikinarigos ha usa nga kanal ha Brgy Juaton, Ormoc City samtang nahingorosoos an pag-uuran.
Nagkamagtay gihapon in 45 anyos nga lalaki ha Gandara Samar ngan 87 anyos nga mangirisda ha San Francisco Southern Leyte tungod hin kalumos.
An usa pa nga biktima in lalaki gihapon, pero waray pa iginhatag nga kadugangan nga detalye an mga otoridad. Labot la han mga nagkamamatay, mayda pa usa ka tawo tikang ha Marabut, Samar an nawawara.
Ha luyo nga bahin, an syudad han Calbayog in nagdeklarar na hin State of Calamity ha ira lugar kay 30 porsyento han ira nasasakupan in dako an maraot nga epekto han bagyo.
Umabot hin sobra 13 Mil nga indibiduwal ha Eastern Visayas an temporaryo nga ginpa-ukoy ha mga evacuation centers durante han pag-agi ni Paeng.
Maabot naman hin 2,041 nga mga pasaheros, 620 nga behikulo ngan upat nga barko an na-stranded ha bug-os nga rehiyon tungod pa gihapon han bagyo.#
