Isumat.com/8:03AM, September 05, 2020
Iginpasamwak han PNP Regional Office nga umabot na ha 37 nga kapulisan han rehiyon an nagpositibo han Covid-19.
Sumala han report, upat ha ira an naka-recover na samtang an iba mga Active Cases hapagkayana. An Samar PNP Provincial Office an may nahipatik nga damo an natapnan ug 16 na ini nga kapulisan. Gintotoohan nga natapnan hira dida han mga checkpoints labi na nga kadam-an nga pasyente didto han probinsya in na-iigo han kagaw pinaagi han local transmission.
Kasumpay hini, iginpahayag gihapon han PRO-8 nga nakabalik na nganhi ha Eastern Visayas yana nga semana an grupo han kapulisan nga iginpadara ngadto ha Cebu basu bumulig pagpasunod han lockdown didto han nasabi nga lugar.
Dida han 54 nga nagkalakat ngadto ha Cebu, 49 na an nakabalik ngan mayda pa lima nga gin-momonitor an kahimtang han panlawas didto ha Cebu.
Ha luyo nga bahin, 3,345 na an kabug-usan nga nagpositibo han Covid ha bug-os nga Sinirangan Bisayas. Ini in kataliwan la magrehistro hin 96 nga bag-o nga kaso kakulop, Setyembre 4. An Active Cases ha Region 8 in aada ha 1,155, samtang an naka-recover in umabot na ha 2,164.
An Tacloban City an nabunalan han gidadamu-i nga bag-o nga positibo kakulop. Ginkokomponer hin duha nga LSI ngan 41 nga close contacts an bag-o nga mga natapnan dida han syudad. Lapos na hin 500 an mga Taclobanon nga nadarahigan han kagaw ngan sobra 300 an Active Cases yana. #
