Isumat.com/9:50AM, September 04, 2020
Dako an posibilidad nga tikang ha Northern Samar an virus nga nakatapon hin porlomenos 15 nga mga residente han Calbayog City. Ini nga 15 in lakip dida han bag-o nga 90 nga kaso nga iginreport han DOH Regional Office kakulop, Setyembre 3, 2020.
Dida han pahayag han Calbayog City Information Office, an 15 nga nagpositibo kakulop in mga close contacts ni Calbayog Patient # 43. Dida han pagsusi han Isumat.com, ini nga 27-anyos nga lalaki in iginka-usa hin kumpirmado nga kaso nga taga Allen, Northern Samar. Nagka-upod ini nga taga Calbayog ngan taga Allen hadton Agosto 17-18.
Hinungdan hini, aada an posibilidad nga hi Calbayog # 43 in natapnan han taga Allen, ngan pagbalik niya ha Calbayog iya liwat nagkatatapnan an 15 katawo nga iya close contacts. Ha kabug-usan, 58 na an nagpositibo nga Calbayognon ngan sobra na katunga an naka-recover.
Dida han report han DOH kakulop, nadugangan an Tacloban City hin 18 nga pasyente ug gintotoohan nga nagkatatapnan hira pinaagi han local Transmission. Hapagkayana, haros 50 na nga barangay han syudad an may ginpapasunod nga Zonal/Granular Lockdowns.
Ha luyo nga bahin, namimilegro gihapon nga magkulang hin mga Health Workers an Eastern Visayas Regional Medical Center labi na an Magsaysay Hub kun diin naka-admit an mga kumpirmado nga kaso ngan pasyente han mga Severe Acute Respiratory Illness (SARI).
Nagsering hi EVRMC Media Relations Officer Amelita Avenido nga kun magpadayon an katapni han mga personales han hospital, dako an posibilidad nga kukulangon hira hin personales nga magtitimangno han mga pasyente. Hapagkayana, sobra 150 an pasyente ha Magsaysay Hub.
Maabot naman hin 154 an nagkatatapnan nga EVRMC Health Workers pero an iba in naka-recover na. Dida han report kagab-i han DOH, pira na liwat nga Health Personnel an na-alakbatan han kagaw. Deri nakakatudlok hin rason an tagdumara han hospital kun kay-ano nagkakatatapnan an ira mga empleyado ha luyo nga hingpit man an ira pagtuman han Health Standards ngan kumpleto hira han Personal Protective Equipment.
An Eastern Visayas in nagkaada na hin 3,249 nga nagpositibo han virus kun diin 2,055(63%) na an nakatalwas. Mayda naman 1,168 nga Active Cases yana ngan 26 na nga pasyente han Covid an namatay. #
