Isumat.com/ 1:32PM, May 10, 2020
Mayda na liwat bag-o nga resulta hin mga swab samples tikang denhi ha Eastern Visayas an nakadangat ha Department of Health Regional Office.
An DOH in nagpahayag yana nga pasado ala 1 han kulop (Mayo 10) nga negatibo ha corona virus an 36 nga samples tikang hin mga Suspected Cases ha aton rehiyon.
Kagab-i, iginreport han ahensya nga negatibo gihapon han makamaratay nga kagaw an 87 nga samples. Hapagkayana, mayda pa 195 nga samples an ginpapamulat an resulta dida han confirmatory test nga gindudumara ha Vicente Sotto Memorial Medical Center ha Cebu.
Samtang, buwas nga adlaw(Mayo 11) nakatalaan magtikang na an operasyon han Molecular Laboratory para han corona virus ha EVRMC-Magsaysay Tacloban. Dara hini, deri na igpapadara ha Cebu an mga samples kay dida na hini nga laboratoryo hihimoon an confirmatory test.
Sumala han report, 90 nga samples an nakatalaan ig proseso han EVRMC Laboratory dida han syahan nga adlaw han ira operasyon.
Nagpapabilin nga 19 ka tawo an nag positibo han COVID-19 ha Sinirangan Bisayas ug sobra 800 an Suspected Cases hapagkayana. # (KEVIN SIOSANA)
