Isumat.com/8:03AM, May 10, 2020
Gugma ba an rason basi maka-akos hin pangawat?
Usa nga lalaki an nagkalagong-lagong ha karsel han arestuhon hiya dara hin pag shoplift hin upat nga saruwal dida hin usa nga tindahan ha downtown Tacloban hadin Huebes nga adlaw.
Ginkilala an suspetsado ngahi Marco Piralta, may igo nga pangidaron ngan residente ha Palanog, Tacloban. Sumala han report han Abucay Police Station, hi Piralta in sumulod ha Novo Jeans and Shirt Store para mag shopping kuntaloy. Deretso hiya ngadto han Women’s Section ug sugad sugad nga nanmimiling hiya hin saruwal nga panbabaye.
Han iya maobserbaran nga waray nakakakita ha iya, hinayhinay nga iginsulod niya ha iya sling bag in upat nga long pants. Deri hiya maaram nga gin-iininaw la hiya hin security guard nga deri naka-uniporme.
An suspetsado in pasimple nga matigawas na unta, pero an Intel Guard in nagradyo dayon ha iya mga kausa didto han garawsan han tindahan. Pag-abot ngadto han suspetsado ginpa-ukoy hiya ngan ginpa-abrihan an iya sling bag ug nakit-an didto an mga saruwal.
Kadagmitan tumawag ha Police Station an superbisor han tindahan ngan pag-abot han kapulisan, naaktuhan pa nira nga an mga saruwal in didto ha sulod han bag han suspetsado. Ginpaki-anhan an suspetsado han mga imbestigador kun kay-ano nag shoplift hiya. An baton han suspetsado: Igreregalo niya ha iya girlfriend.
Gindara an suspetsado ha istasyon han kapulisan ug an nagdudumara han tindahan in nagpahayag nga magsasalawad han kaangayan nga kaso kontra kan Piralta.
Waray liwat mahisumat ha blotter kun nagsumat an suspetsado ha iya oyab nga nadakop hiya tungod la nga karuyag niya makaghatag hin kalipayan han iya higugma-on. # (KEVIN SIOSANA)
