Isumat.com/10:39AM, Pebrero 16, 2021
Nagpapadayon an pagbalik ha panig han gobyerno han mga kaapi han kumunista nga New Peoples Army.
Ha report han Northern Samar Provincial Police Office, an mga bag-o nga nag-surender in ginkilala nga hira alias Ka Eldy, Ka Redy ngan Ka Justin in personal nga ginkarawat ni Col Arnel Apud, hepe han kapulisan han mao nga probinsya, kakulop, Pebrero 15, 2021.
An 52-anyos nga hi Ka Eldy in sumurender hadton Pebrero 11 ha 2nd Mobile Force Company nga pinamumunuan ni LtCol Rafael Tabayan. Iya igintubyan in duha nga granada ngadto han mga otoridad. Hi Ka Eldy amo an lider han Agila Squad, Sub-Regional Committee Arctic nga nagi-os ha Catubig ngan Las Navas nga mga bungto.
Igindugang pa han report nga hadton Pebrero 14 nagsurender naman an 25-anyos nga hi Ka Redy, nga kaapi han Prente-Edukasyon Squad. An Silvino Lubos PNP an nagfasilitar han pagtubyan ni Ka Redy. Ha iya pagsurender, dara niya an kalibre 38 nga pistola ngan lima nga bala. Tungod han iya pagsurender, hi Ka Redy in utro iginka-usa han iya bugto nga hi Ka Andy, menor de edad nga kaapi han NPA nga nadakop hadton Hunyo 2020.
Ha luyo nga bahin, an 28-anyos nga hi Ka Justin in nagsurender gihapon upod an iya kalibre 45 ngan mga bala. Hiya in miembro han Sub-Regional Committee Emporium, Amihan Squad ngan nagseserbe gihapon komo medical officer han grupo.
Nagsering hi Apud nga ini nga pagsurender in klaro nga pagpamatood nga nakasantop na hira nga sayop an ira gin-apihan nga kagi-usan. Kasumpay hini, gin-utro han opisyal an panawagan ha mga rebelde ha Northern Samar nga bumalik na ha panig han gobyerno kadungan han pagpasarig nga ighahatag han gobyerno an mga benefecio para makagtikang hira hin mamurayaw nga kinabuhi upod han ira tagsa-tagsa nga pamilya. #
