(Photo by iFM-RMN Tacloban)

Isumat.com/10:13AM, Pebrero 16, 2021

Upat ka adlaw tikang patayon in usa nga pulis ha Palo, Leyte, usa naman nga empleyado han DENR an binawi-an hin kinabuhi dida hin panggama natabo pasado alas 7 han aga, Pebrero 16, ha Apitong, Tacloban City.

Dida han inisyal nga imbestigasyon han Tacloban PNP, ginkilala an biktima nga hi Rodolfo Concillo, 59 anyos, nagtatrabaho ha DENR-CENRO ha Palo, Leyte.

Hi Concillo, nga taga Lolita Subd, in nagmamaneho han iya motorsiko han matabo an panmusil ha iya. Pira la ka metros tikang han pakagawas niya han subdivision, ginpanmumusil hiya han mga suspetsado nga luran hin motorsiklo.

Nag-antos hin pira nga igo hin bala an biktima, hinungdan han iya kamatay. An mga suspetsado in kumalagiw hin kadagmitan.

Nagsumat in pira nga nakasaksi han krimen, nga makuri makilal-an an mga suspetsado kay nakahelmet ngan naka-face mask. Ira pa iginsaysay nga pira na ka minutos nga nagbantay dida han lugar an mga nanmusil antis an panhitabo.

An mga otoridad in nagdudumara na han imbestigasyon basi matudlok an nagbuhat ug an motibo han krimen.

Ha impormasyon nga nahikay han Isumat.com, hi Concillo in pamilyado. An iya misis in natrabaho gihapon han gobyerno ngan mayda hira mga anak. Antis hiya magin Forest Technician ha CENRO-Palo, nadestino anay hiya ha CENRO-Sta Rita, Samar komo Forest Ranger.

Iginsumat pa han surok han impormasyon nga posible tikang ha Mindanao an biktima kay damo an natawag ha iya nga “Muslim.”

Han una nga semana, usa nga pulis nga naka-assign ha Leyte Provincial PNP Office an gin-ambush ngan namatay samtang sakay han iya motorsiklo ha Brgy Arado, Palo, Leyte. #