Isumat.com/Pebrero 18, 2022
Mabalik ha karsel an usa nga lalaki samtang makakatilaw hin ka-preso ha syahan nga higayon in duha pa katawo han magkadadakop hira ha magkalain nga anti-illegal drug operations han mga otoridad ha Tacloban City hadin nag-agi nga duha ka adlaw.
An suspetsado nga hi Redjess Tanpingco, 42 anyos in na-aresto han mga operatiba han Tacloban City PNP Drug Enforcement Unit ha Brgy 110, Utap, Tacloban City.
Dida han operasyon nga ginbuhat pasado alas 9, Pebrero 17, 2022, nakapalit an mga pulis hin usa ka sachet hin gintotoohan nga droga ngan nakuhaan pa hin kadugangan nga 21 ka sachet. Subay han inisyal nga imbestigasyon, an iligal nga droga in may kabug-aton nga 15 gramos ug nagkakantidad hin porlomenos 80 mil pesos.
Hinsabutan nga an suspetsado in napreso na hadto hin walo ka tuig tungod gihapon hn paghikanit han iligal nga droga.
Samtang, hadton Pebrero 16, nagkasisikmit in duha nga suspetsado ha operasyon han Special Operations Unit han PNP Regional Office ha Brgy 105, Sto Nino, Tacloban City.
Ginkilala an mga gintatahapan nga hira Rene Paul Lagario, 33 anyos, nag-uukoy ha Brgy 105, St Francis Village; ug hi John Henry Villagracia, 23 anyos, residente han North Hill Village, Brgy 106.
An mga tinubyanan han balaud in nakakumpiskar hin lima ka sachet hin gin-aalegar shabu tikang han mga suspetsado. An droga in balor hin 9 mil pesos.
Hapagkayana, nakapaslak ha bilangguan an mga suspetsado ngan sasampaan han kaangayan nga mga kaso. #
