Isumat.com/Mayo 8, 2023
Nagkamamatay in tulo ka tawo ha magkalainlain nga aksidente ha kadalanan ha Sinirangan Bisayas kakulop, Mayo 7, 2023
Hadton pasado alas 4 han maagahon, Mayo 7, an biktima ginkilala nga hi Susana Lamoste, 52 anyos ngan residente han Brgy Campetic, Palo, Leyte an binawi-an han kinabuhi han matudol hin behikulo ha National Highway han mao nga lugar.
Ha imbestigasyon han kapulinsa, an biktima in nagbabaktas hadto nga takna han matudol hin busag nga Toyota van. Nagpaharurot an behikulo nga nahidabi ngan waray manginano han biktima.
Gindara pa ha hospital hi Lamoste pero igindeklarar nga dead on arrival.
Didto naman ha Laoang, Northern Samar, usa nga babaye nga estudyante an namatay han ma-aksidente an motorsiklo nga iya sinasakyan.
Ginkilala an biktima nga hi Geriza Cidro, 18 anyos ngan taga Brgy Rawis han mao nga bungto.
Hi Cidro ug an iya kaupod nga hi Alonica Tamayo, 18 anyos, drayber han motorsiklo, in nagbibiyahe pasado alas tres han kulop tikang manmatron ha Brgy Lawaan han matabo an aksidente.
Ha imbestigasyon han kapulisan, sumangit an jacket ni Cidro ha urhi nga kaliding han motorsiklo rason han pagsemplang han sarakyan. Nag-antos hin grabe nga karamtan ha ulo an biktima hinungdan han iya kamatayon.
An drayber han motorsiklo in nag-antos gihapon hin injuries ngan gintambal ha hospital.
Samtang ha Brgy Londres, Allen, Northern Samar, an drayber han motorsiklo nga hi nga hi Joel Brin, 39 anyos, in namatay han mahidabi hin disgrasya an iya ginmamanehoan nga motorsiklo pasado alas una han kulop, Mayo 7, 2023.
Dida han imbestigasyon, nabanggaan an motorsiklo han biktima han Hyundai van nga ginmamanehoan ni Aldrich Tibayan nga taga Camarines Sur.
An behiulo ni Tibayan in nakasagi anay hin Toyota Innova nga nagpaparking ha ligid han kalsada ngan tungod han impact in kumabat ha kaluyo nga dereksyon han kalsada kun diin nagsusulsog an motorsiklo.
Tungod han mga injuries ha lawas, gindara ha hospital an drayber ngan angkas hini ha Allen District Hospital, pero dead on arrival an drayber nga hi Brin. #
