Iginpasamwak yana han Department of Health – Eastern Visayas Center for Health Development nga an syahan nga batch hin samples nga ginpadara ha Vicente Sotto Memorial Medical Center (VSMMC) para han COVID-19 testing in ngatanan negatibo.
Ini nga batch nga mayda 23 nga samples an ginsusi didto ha VSMMC-Cebu hadton Martes, Marso 24, 2020 ug nagresulta nga negatibo dida han confirmatory test.
Sumala pa han DOH-Eastern Visayas, napulo han samples in tikang ha probinsya han Leyte, lima ha Tacloban City, tulo an tikang ha Southern Leyte, duha ha Northern Samar, ngan tag-urusa an tikang ha Ormoc, Eastern Samar ngan Biliran. Dara hini, an 23 nga mga Persons Under Investigation (PUI) nga ginkuhaan han samples, in puede na ma-discharge o makagawas ha mga hospital kun diin gin confine hira.
Igindugang pa han DOH nga yana gihapon nga adlaw umabot ha VSMMC an ikaduha nga batch han mga samples tikang ha aton rehiyon para han confirmatory testing.
An VSMMC in usa han dagko nga mga hospital han nasud nga ginhimo nga subnational laboratory center para han COVID-19. An mga samples tikang denhi ha Region 8 in ha VSMMC na igpapadara basi maibanan an duro hin kadamo nga mga samples ha Research Institute for Tropical Medecine (RITM) ha Manila. #
(Posted 1:57 PM, March 28, 2020)
