Isumat.com/Hunyo 5, 2023
Naawat an kinabuhi han duha nga construction workers han magpabuto hin bomba an gin-aalegar nga mga miembro han New People’s Army ha Brgy Magsaysay, Las Navas, N. Samar hadton Sabado, Hunyo 3, 2023.
Ha inisyal nga imbestigasyon, ginkilala an mga biktima nga hira Rowel Lebico ngan Hersan Cabe, mga residente han Brgy Quirino han nasabi nga bungto.
Pasado alas onse han aga, sakay hin motorsiklo hira Lebico ngan Cabe han magbuto an anti personnel mine o bomba nga igintanom han mga suspetsado ha kalsada. Tungod hini, nag-antos hin grabe nga karamtan ha lawas an mga biktima.
Nagpapakita gihapon an imbestigasyon nga labot la han mga bomba, mayda liwat mga igo hin pusil ha lawas han mga biktima.
Hira Lebico ngan Cabe in nagtatrabaho dida han ginhihimo nga kalsada ha tay-aw nga mga barangay ha Las Navas.
Ini nga panhitabo in mahugot nga ginkondenar han Pwersa Armada han Pilipinas. Sumala han 20th Infantry battalion han Philippine Army, ini in klaro nga pagtalapas han mga rebelde han International Humanitarian Law.
Pira na ka beses nga gumamit hin landmine an mga rebelde kun diin nagkamamatay an mga sundalo ngan inosente nga mga sibilyan ha Northern Samar, pahayag pa han Philippine Army. #
