Isumat.com/8:07AM, October 6, 2020
Nadakop han mga tinubyanan han balaud an duha nga kaapi han rebelde nga New Peoples’ Army nga may gin-aatubang nga mga kaso.
Syahan nga na-aresto han kapulisan hi Renato Rodriguez, alias Alex, taga Brgy Hinaguimitan, Mahaplag Leyte, ngan temporaryo nag-uukoy ha Brgy Ponblacion, Anahawan, Southern Leyte. Nadakop hi Rodriguez han gintibhong nga pwersa han Regional PNP ngan Southern Leyte PNP.
An mga otoridad in armado hin warrant of arrest kontra kan Rodriguez dara han mga kaso nga murder ngan frustrated murder. Ini nga mga kaso in nag-ugat han pagilambigit han suspetsado dida han panggama han mga kaapi han PNP Mobile Force Company hadton 1993.
Ha iba naman nga operasyon, na-aresto hi Felix Dumali, alias Gaspar ngan Pony, residente han Sogod, Southern Leyte. Hiya in anay kaapi han NPA ug naatubang hin 15 ka ihap hin murder.
An duha nga mga suspetsado in nakapaslak na yana ha karsel ngan igintalaan na an ira pag-atubang ha korte. #
