Isumat.com/Setyembre 20, 2021
Tungod han paggamit hin iligal nga pamaagi ha pagpakabuhi, nagresulta lugod ini han kaawat han ira mga kinabuhi.
Duha nga parupangisda an namatay ngan nasamad an duha nira nga kaupdanan han bumuto an dinamita nga iglalabay na unta ngadto han kadagatan hadin nakalabay nga adlaw ha Brgy Malayog, Tinambacan District, Calbayog City.
An mga nagkamamatay in ginkilala han kapulisan nga hira Cristobal Rosalado, 50 anyos ngan hi Jamer Sigue, 32 anyos. Nasamad naman an 27 anyos nga hi Daryl Tahos ug an 24 anyos nga hi Rogelio Diaz Jr nga nadara ha hospital ngan yana gintatambal.
Dida han inisyal nga imbestigasyon, an mga biktima in gin-aalegar nga naghihimo han iligal nga paagi hin pangisda pinaagi han pagbadil. Hadto nga takna, hi Rosalado in maglalabay na unta ha kadagatan han dinagkutan nga dinamita han tigda bumuto ini ha iya kamot.
Tungod han pagbuto, grabe an mga karamtan ha lawas nga gin-antos nira Rosalado ngan Sigue nagdalan han ira kamatayon ngan paka-angkon hin karamtan ha lawas han duha nga ira kaupdanan.#
