Isumat.com/Setyembre 21, 2021
Nagkasisikmit in usa nga anay pulis, usa nga anay jail guard ngan empleyado hin pampubliko nga eskwelahan ha magkalain nga anti- illegal drugs operations han mga tinubyanan han balaud ha Tacloban City ngan Palo, Leyte, kakulop, Setyembre 20, 2021.
Dida han record ha Palo Municipal Police Station, an mga operatiba han Philippine Drug Enforcement Agency, Leyte PNP Drug Enforcement Unit ngan Palo PNP Station an nagdumara han buy-bust operation ha Brgy Baras, Palo pasado alas 6 han gab-i.
Dida han mao nga operasyon, na-aresto an mga suspetsado ginkilala nga hira Carlo Merida, 40anyos, anay kaapi han PNP ngan nag-uukoy ha Brgy Loyo, Basey, Samar; ngan Ricthie Abando, 43 anyos, residente han Palo ngan anay nagtatrabaho ha Leyte Provincial Jail.
Nakapalit hin usa ka sachet hin gintotoohan nga shabu an kapulisan tikang ha mga gintatahapan ngan dida han pagkapkapi ha ira, narekupo in tulo pa nga sachet hin gin-aalegar nga droga. Nagsering an mga imbestigador, may timbang nga 7 gramos an gintutudlok nga droga nabalor hin 47 Mil pesos.
Samtang, usa nga Administrative Aide han Tacloban City Agricultural School ginkilala nga hi Dubcek Tan Agote in nakwelyuhan han mga otoridad didto ha Brgy 94-A, Basper, Tacloban.
An mga tropa han PDEA, Tacloban City PNP ngan PNP Regional Drug Enforcement Unit in nakakumpiskar hin 5 gramos hin gin-aalegar nga shabu tikang kan Agote nga residente han Brgy 109-A, V&G, Tacloban. Sumala han mga kapulisan, kantidad hin 35 Mil pesos an droga nga narekupo.
An mga suspetsado han magkalain nga insidente in nakapaslak yana ha mga detention facility ngan nakatalaan umatubang han mga kaso nga igsasalawad kontra ha ira. #
