Isumat.com/Hunyo 21, 2023
Nagrayhak an Remedios Trinidad Romualdez Medical Foundation (RTRMF) tungod han kahilakip ha Top 10 han duha nga estudyante sugad man nagin Top Performing School an eskwelahan dida han 2023 Physical Therapist Board Examination nga gindumara yana nga bulan.
Dida han iginpagawas nga resulta han Professional Regulations Commission (PRC) an produkto han RTR nga hi Dodievic Villena Arma an naka-angkon han ika-lima nga pwesto pinaagi han grado nga 89.00.
Ha luyo nga bahin, hi Fatima Therese Velarde Doyon nga tikang gihapon ha RTRMF an nakakuha han ikanapulo nga pwesto ha rating nga 87.55.
Dida han kategorya nga 30 o sobra pa nga ihap han mga estudyante nga kumuha han eksaminasyon, an RTR an nanguna ha bug-os nga nasud pinaagi hin 92.11% passing rate.
Syento porsyento naman an passing rate han RTR para han first-time takers han eksaminasyon.
Ha kabug-usan han nasud, dida han 1,026 nga kumuha han PT Licensure Examination, 708 an nakapasar.
An nasabi nga eksaminasyon in ginhimo ha mga testing centers ha Metro Manila, Cebu, Baguio, davao, Iloilo, Legaspi, Pampanga ngan pangasinan yana nga bulan han Hunyo. #
